Esperance-de-Tunis.net
Toute l’information sur le doyen des clubs tunisiens

لمّا الدولة تغطّي على الفساد الرياضي

99153633_178586286831466_8163423813858492416_n

أيّا سيدي السلام على المكشخين الكلّ سيدي رمضان مشى على روحو و العيد عيّدناه و إن شاء الله كل عام و أحنا حيّين ب1919 خير.

لكن على المستوى الرياضي كي نحكييو على الخير، تقريب الدولة موش تعطي فيه للناس الكلّ كيف كيف. فمّا جمعيّة، إذا مازال يحقّ عليها إسم جمعيّة، الدولة و عديد المؤسّسات الوطنيّة حالفة بأيمنات غليظة أنّها بش تحلّلها مشاكلها بالمال العام و على حساب الفرق الأخرى

ما يزّيش آش عمل سي الجريء في السابق معا الفريق المعني بش منّعوا من سحب نقاط في الترتيب و خلّصلو خطايا و بالعملة الصّعبة، ما يزّيش رئيس الحكومة الأسبق يوسف الشاهد (زنطور الإنتماء) آش سهّللهم من تسهيلات بش خلّصوا جانب لاباس بيه من الديون عن طريق البنك المركزي…

اليوم و مشاكل هذا النادي، الّي تاريخو الكلّ مبني على المغالطة موش وقتو توّا بش نرجعوا عليها، مشاكل مازالت متراكمة جُرّة الكذب متع رئيسهم الأسبق القلّاب و الّي هارب من تونس، و جرّة رئيسهم الحالي الّي ما عندو كان الشبّ، مشاكل مازالت بش تطوال بالديون و الخطايا و ماهيش بش توفى، جاي السيّد وزير الرياضة يعطي فيهم في فلوس أخرى من المال العام للجمعيات الكلّ و على حساب مصاريف و تمويلات المنشأت الرياضية الّي تشكي لربّي و متهرّئة…

بأنا حقّ العباد هاذي تتصرّف في المال العام من أجل إنقاذ فريق آخر همّو هو حسن التصرّف ؟ شنوّا المنطق الّي ماشين فيه العباد هاذم بش يعطييوْ فلوس النوادي الأخرى بش يخلّصوا ديون فريق ما خلّصشي فلوس النّزل الّي عملوا فيهم تربّصات و ما خلّصشي فلوس مزوّدين الماء و مستلزمات الرياضة، فريق ما صرفش حتى ملّيم في صيانة ملك من أملاك المجموعة العموميّة كيف البارك إلّي على ذمّتهم …

كيفاش و بأنا حقّ ؟ ياخي إنتماء رئيس الحكومة الأسبق و إلّا وزير الرياضة الحالي يسمحلهم بش يتجاوزوا كلّ القوانين و الأعراف لحساب فريق غير مُحترم أبسط قواعد القانون و مبدء الشفافيّة ؟ ياخي على سبيل المثال كي كان وزير رياضة أسبق في شخص طارق ذياب، قدّم حاجة و إلّا إمتياز خاصّ لفريقو الترجي الرياضي التونسي ؟

و على ذكر فريقنا المُفدّى، ياخي على خاطر الترجي الرياضي التونسي يسيّر فيه راجل (بأتمّ المعنى للكلمة) يعشق جمعيتو و يصرف عليها بلاش حساب، يطبّق عليه قانون المنع من المنح بداعي ديون لصالح الحي الرياضي و الفريق لاخر تعطييوه فلوس على حسابنا و حساب غيرنا ؟ الجامعة شادّة علينا مبلغ ما قيمتو 350 ألف دولار (أكثر شويا من مليار) قال شنوّا تو يخلصوا حتّى تتخصم منها ديون مزعومة، الوزارة ما خلّصتناش في منحة الكرة الطائرة منذ سنة 2014 بطولة العرب و كأس إفريقيا…

ياخي وين ماشين بيها الحكاية هاذي ؟ ما فمّاش قانون في البلاد ؟ ياخي هالفريق الّي مسمّي روحو فريق الشعب و هي الحكومة و رئيس الجامعة و رئيس مجلس النوّاب يصرفوا عليه و يدزّوا معاه و يوصّييوْ عليه، ماوْ لاباس؟

ياخي الدولة تحارب في الفساد و الّا تشجّع في الفساد ؟ الفريق هذا غارق في الفساد و التحيّل و الغشّ بدليل أنّ الإتحاد الدولي لكرة القدم و عديد الفرق و عديد اللاعبين تلاحق فيه جرّة الفساد المالي و سوء التصرّف و الدولة تعاون فيه ؟ و بفلوس المال العام ؟

هذا هو الفساد بعينه و ماناش بش نسكتوا عليه لو لزم الأمر أنّنا نحارب الدولة لأخذ حقّ جمعيتنا الترجي الرياضي التونسي

هيئة تحرير الموقع

Ecrit par

Rechercher sur le site