قبل نهار الجمعة ما تنساوش تعب المرحومان محمّد الزواوي والهادي القلّال بين عام 1917 و1918، الي عملو مدرسة متاع كورة و اخلاق و وطنية، و اهدوها للملايين من الأجيال بعدهم
قبل نهار الجمعة ما تنساوش الي عملوا لمرحوم الشّاذلي زويتن عام 1924 باش منّع التّرجّي من مؤامرة السّلط الفرنسيّة لحلّ التّرجّي، و ما تنساوش قدّاش عدّى من عمرو واقف على جمعيّة جبّارة
قبل نهار الجمعة ما تنساوش عام 1971 وشنوّا عملولنا اعداءنا، ما تنساوش معاناة المرحوم حسّان بلخوجة باش رجّع التّرجّي عالسّكّة
قبل نهار الجمعة، ما تنساوش الي التّرجّي عمرها 100 سنة، ما تنساوش الي الترجي مازال قدّامها مئات السنين و أجيال تحميها و تبنيها
قبل نهار الجمعة ما تنساوش انّو الترجي موش ملك جيلنا، تذكرو انها تاريخ عظيم و حاضر عظيم و مستقبل أعظم، تذكرو انها موش ملك جهة، و تذكرو انو قلوب الملايين من المواطنين بجميع طبقاتهم في المدن و الأرياف و الدشر، تنبض بإسمها، تذكرو انها امل لشعب كامل، تذكرو انها امل للزّوّالي، و المريض، و تذكرو انها فرحة التلميذ و الطالب و الموظف و الي لاباس عليه…
قبل نهار الجمعة تذكرو انّها مدرسة رياضة و قلعة إنجازات رياضيّة يحكي عليها العالم
قبل نهار الجمعة ما تنساوش المئات من الرجال الي أعطات من جهدها و وقتها للجمعيّة هذي، تذكرو المئات من الرجال الي وقفت بعد الخيبات تقاوم و رجعت الجمعية كل مرّة للأنتصارات و التّتويج…
قبل نهار الجمعة ما تنساوش انّو الترجي تقلّق، ما تنساوش انّو اعداءها يعملو في المستحيل باش يعطلوها، أنّهم يكمبنو و يتمنّاو في فرصة باش يقصيوها من المسابقات الافريقية، ما تنساوش انّهم كي ما نعملوشي غالط، يحاولو رغم ذلك يكمبنو باش يقصيوها، و رغم هذا الترجي و رجالها واقفينلهم…
قبل نهار الجمعة تذكرو انّو الناس الي تحفر للترجي تحكم في الكاف، تذكرو انهم قبل حتى الماتش عاقبونا بمليار و تسكير جزء من المدارج، و تذكرو انّو احلى امنية عند أعداء الترجي هي اقصاءها لسنوات من افريقيا لا قدّر الله، مع ما يعنيه الامر من غياب المداخيل و الإشهار، و التتويجات، و غياب اسم الترجي بين اقوى جمعيّات القارّة..
قبل نهار الجمعة ما تنساوش انّو احنا مكشخين اليوم، و انّو مستحيل نعطيو لأعداء الترجي سلاح يضربوها بيه
قبل نهار الجمعة ما تنساوش انّو ماتش في حياة جمعيّة عظيمة اثبتت على مرّ تاريخها انّها ما تاقف على حدّ و ما تاقف على حتّى لقب…
نهار الجمعة مطلوب من 60 الف محبّ حاجة برك، غليان تشجيع نظيف و سند جبّار لل11 ملاعبي في الميدان لمدّة 90 دقيقة، رادس لازمو يغلي 90 دفيفة بدون توقّف، لكن رادس لازم تتلعب فيه مباراة كورة لا غير، مبارات من آلاف المباريات في تاريخ الترجي و مستقبلها… مطلوب منّا حاجة برك: تشجيع رجالنا في التيران على خاطر صدقوني، بالكورة برك قادرين نفكّو لقبنا، ما نشتّتوش تركيز ملاعبيتنا، و في جميع الحالات الترجي ديما في السماء العالية
قبل نهار الجمعة تذكرو انّو الترجي وصيّة الأجداد، تذكرو انها ملك الأجيال الجايّة، تذكروا وصيّة الأجداد
